کابل ټکی کام (جمعه، ۱۳ سلواغه، ۱۴۰۲ل)
په داسې حال کې، چې د قطر، مصر، ترکیې، امریکا او ځینو نورو هېوادونو له لوري د حماس اسلامي غورځنګ او اسرائیلو ترمنځ د یو تلپاتې اوربند لپاره هڅې روانې دي، حماس غورځنګ له غزې څخه په بشپړ ډول د صهیونیستي ځواکونو د وتلو او د ټولو فلسطیني بندیانو د خوشې کولو غوښتنه کړې ده.
د منځګړو هېوادونو سرچینو رسنیو ته ویلي، چې اوربند ته نږې شوي او اسرائیل اوربند ته لیواله دي؛ خو دوی غزه کې د حماس غورځنګ د لوړ پوړي پوځي قوماندان “یحیی سنوار” دریځ ته په تمه دي.
یحیی سنوار ته نږدې سرچینو الجزیرې تلویزیوني شبکې ته ویلي، چې د نوموړي دریځ څرګند دی. د یو اسرائیلي بندي په بدل کې د ۱۵۰ فلسطیني بندیانو د خوشې کولو ترڅنګ له غزې څخه په بشپړه توګه د ټولو صهیونیستي اشغالګرو پوځیانو د وتلو غوښتونکی ده.
یو ترکي چارواکي چې د حماس- اسرائیلو ترمنځ خبرو کې منځګړیتوب کوي د نوم نه ښودلو په شرط رویټرز خبري آژانس ته ویلي، چې دوی قطر کې د حماس د سیاسي دفتر سره په اړېکه کې دي؛ خو د هغوی ځواب دادی، چې ترڅو “یحیی سنوار” اروبند ونه مني دوی څه نه شي کولی.
په ورته مهال داسې راپورونه هم خپاره شوي دي، چې د غزې تړانګې له شمالي او جنوبي سیمو څخه سلګونه صهیونیستي ترهګر پوځیان تښتیدلي دي او تر شا یې ډول-ډول درنې او سپکې وسلې پریښې دي
