غزه کې خونړۍ نښتې؛ ۴۰ صهیونیستي پوځیان وژل شوي
کابل ټکی کام (پنجنشبه، ۱۲ سلواغه، ۱۴۰۲ل)
د راپورونو له مخې د غزې تړانګې په شمال کې د حماس ځواکونو او صهیونیستي اشغالګرو پوځيانو ترمنځ خونړۍ نښتې روانې دي، چې په پایله کې یې ۴۰ نیواکګر اسرائیلي پوځيان وژل شوي او لسګونه نور ټپیان دي.
د حماس اسلامي غورځنګ د پوځې څانګې “القسام” لېوا یوې سرچینې “کابل ټکی کام” ته په یو لیکلي پیغام کې وویل: هغه اسرائیلي اشغالګر پوځیان یې د ځواکونو په کمین کې لوېدلي، چې د غزې تړانګې له شمال څخه په تېښته و.
د حماس دغه سرچینه زیاتوي: په یاده جګړه کې یې د اسرائیلي ترهګرو پوځیانو ۱۶ ټانکونه ویجاړ کړي، چې په پایله کې یې د ۶ تنو مهمو قوماندانانو په ګډون ۴۰ پوځیان وژل شوي او ګڼ شمېر نور ټپیان شوي دي.
که څه هم اسرائیلو تر اوسه د حماس غورځنګ د یادې ادعا په هکله څه نه دي ویلي؛ خو ځینو اسرائیلي رسنیو خبر ورکړی، چې نن یې غزه کې یو شمېر پوځیانو ته مرګ ژوبله اوښتې ده.
