کابل ټکی کام (پنجشنبه، ۲۶ سلواغه، ۱۴۰۲ل)
د اسراییلو او حماس ترمنځ د بندیانو د تبادلې د موافقې او په غزه کې د اوربند په اړه د قاهرې په غونډه کې د ناڅرګندې فضا سره سره، حماس غورځنګ په پشپړ ډول له غزې تړانګې څخه د اسرائيلي اشغالګرو پوځیانو د وتلو د اړتیا په اړه یوځل بیا په خپل دریځ ټینګار کړی دی.
د حماس اسلامي غورځنګ د سیاسي دفتر مشر “اسماعیل هنیه” ویلي، هر ډول توافق باید د اوربند او له ټولې غزې تړانګې څخه د اسرائیلي پوځ د وتلو ضمانت وکړي.
نوموړي په یوه لنډه اعلامیه کې چې نن پنجشنبه خپره شوې ویلي، چې په هر ډول تړون کې باید له غزې د اشغالګرو صهیونیستي پوځیانو د وتلو او د بندیانو د تبادلې تړون بشپړ شي.
نوموړي دغه څرګندونې د مصر په پلازمېنه قاهره کې د څلور اړخیزې غونډې له پای ته رسېدو وروسته کړې دي.
د تیرې سه شنبې په ورځ په قاهره کې د امریکا، مصر او قطر له هڅو سره سره چې په دې قضیه کې د پرمختګ لپاره یې وړاندې کړې وه، د حماس او اسرائیلو ترمنځ د بندیانو د تبادلې د خبرو د پرمخ بیولو لپاره د مطلوبې نتیجې له ترلاسه کولو پرته پای ته ورسیدلې.
یوې نړیوالې دیپلوماتیکې سرچینې د “العالم العربي” خبری اژانس ته ویلي، چې موافقې ته د رسیدو په لاره کې د خنډونو له جملې څخه د فتح ګوند د مرکزی کمیټې د غړي “مروان برغوثي” په خوشې کولو باندې د حماس اصرار دی چې اسرائیل په کلکه رد کړی او سره کرښه یې ګڼي.
د ویلو ده، چې مروان برغوثي له نږدې درې لسیزو راهیسې د اسرائیلو په زندان کې شپې او ورځې تیروي. نوموړی د “فتح” ګوند د بنسټګر او د فلسطین د پخواني ولسمشر “مرحوم یاسر عرفات” له نږدې ملګرو څخه ګڼل کېږي او په اسرائیلو په ګڼو مرګونو بریدونو کې په لاس لرلو تورن دی.
