اسلامي امارت: خبرو کې د نه پرمختګ له امله دوحې ناسته کې ګډون بې ګټې دی
کابل ټکی کام (شنبه، ۲۸ سلواغه، ۱۴۰۲ل)
ټاکل شوې ده، چې د روانې مياشتې په ۱۸ او ۱۹ نيټه د قطر په پلازمینه دوحه کې د ملګرو ملتونو د سرمنشي په مشرۍ د افغانستان په هکله غونډه جوړه شي.
تمه کېده، چې اسلامي امارت به هم په دغه ناسته کې ګډون وکړي؛ خو تازه د اسلامي امارت له لوري په خبره شوې اعلامیه کې د ګډون په هکله خبرو کې د نه پرمختګ له امله خپل ګډون بې ګټې بللی.
د اسلامي امارت د اعلاميې متن:
« د افغانستان اسلامي امارت په تېرو دوو نیمو کلونو کې له یوې خوا په کوردننه د نظام د سیاسي، اداري، امنیتي، اقتصادي او اجتماعي بنیادونو د ټینګښت لپاره هڅې روانې ساتلې دي؛ له بلې خوا یې د سیمې هیوادونو سره اړیکو کې ښه پرمختګ کړی دی. همداراز ا.ا. د ملګرو ملتونو، غربي هېوادونو او په ځانګړې توګه متحده ایالتونو سره هم په منظم ډول د ګڼو چاینلونو له لارې د یو اړخیزو نامشروع بندیزونو، تور او جایزې لیستونو او د افغانستان بانک د زېرمو د ازادولو په اړه بحثونه لرلي دي.
د افغانستان اسلامي امارت په دې باور و چي د قطر په پلازمېنه دوحه کې د م.م. د سرمنشي ښاغلي انټوني ګوټېرش په مشرۍ د افغانستان لپاره د ګڼو هېوادونو د ځانګړو استازو ناسته یو بل ښه فرصت و چې پر اختلافي ټکو په کې واضحې او په نتیجه ولاړې خبرې شوې وای.
د بهرنیو چارو وزارت م.م. ته واضحه کړې ده چې، که اسلامي امارت د یواځيني مسؤول لوري په توګه د افغانستان په استازیتوب ګډون کوي او د دوحې ناسته کې د افغان پلاوي او م.م. ترمنځ په لوړه کچه پر ټولو مسایلو د واضحو خبرو زمینه برابره شي؛ نو ګډون به کټور وي، خو په دې برخه کې د نه پرمختګ له امله د امارت لخوا بې نتیجې ګډون ګټور ونه بلل شو.
د یادونې وړ ده، که ملګري ملتونه موجوده حقایق درک کړي او د څو محدودو لوریو تر اغېز او فشار لاندې رانه شي او دا ټکی په پام کې ونیسي چې د افغانستان اوسنی نظام د تېر شل کلن رژیم په څېر د چا تر اغېز لاندې نه راځي؛ نو د دې امکان شته چې د افغانستان اسلامي امارت سره په خبرو کې پرمختګ وشي. د سیمې له هېوادونو سره د ا.ا. تېر دوه نیم کلن تعامل وښودله چې که د تېرو شل کلنو ناکامو تجربو له تکرار څخه ډډه وشي، د یو اړخیزو تحمیلي پرېکړو، تورونو او فشارونو پر ځای یو واقعبینانه او عملګرایانه چلن خپل شي، نورو لوریو سره هم دوو اړخیزو اړیکو کې پرمختګ کېدلای شي».
