کابل ټکی کام (یکشنبه، ۶ کب، ۱۴۰۲ل)
د یمن د وسله والو ځواکونو ویاند” جنرال یحیی سریع” خبر ورکړی، چې جنګياليو يې په سور سمندرګي کې د امریکا په څو پوځي بیړیو د بې پیلوټه الوتکو حملې وکړې او د عدن په خلیج کې یې هم یوه امریکایي بیړۍ په څو توغندیو ویشتلې ده.
په ورته وخت کې امريکايي او برېتانوي ځواکونو په ګډه د یمني ځواکونو پر ګڼ شمېر پوځي اهدافو بريدونه کړي او په سيمه کې تاوتریخوالی تر ټولو لوړې کچې ته رسېدلی دی.
بايد وويل شي، چې د روان ۲۰۲۳ ميلادي کال د نومبر مياشتې راهيسي د یمن وسله والو ځواکونو له لوري په سره سمندرګي کې د اسراییلو، امريکا او برېتانيا لسګونه بيړۍ ويشتل شوي دي او ګواښ يې کړی، چې که دښمن يې له بريدونو لاس وانخلي، باب المندب تنګی به په بشپړ ډول وتړي.
