کابل ټکی کام (يکشنبه، ۶ کب، ۱۴۰۲ل)
د راپورونو له مخې، په افغانستان کې د پانګونې لپاره ایراني پانګوالو او ایران کې مېشتو افغانانو لېوالتیا ښودلې ده.
د صنعت او سوداګرۍ وزارت سرپرست نورالدین عزیزي له هغو ایراني او افغان پانګوالو سره چې د موټرو روغنیاتو په برخه کې پانګونه کوي، ليدنه کړې ده.
د افغانستان د صنعت او سوداګرۍ وزارت ويلي، په دې ليدنه کې د فومن شیمي شرکت رئیس محترم حمید قاسم نژاد او ورسره ایراني او افغاني پلاوې چې په ایران کې د موټرو روغنیات تولیدوي په هرات ولایت کې په یاده برخه کې پانګونې ته لېوالتیا څرګنده کړې او د صنعت او سوداګرۍ وزارت لخوا يې په دې برخه کې د همکارۍ غوښتونه کړې ده.
د ياد وزارت سرپرست له دې پانګونې څخه خوښې څرګنده کړې او هغوی ته يې ډاډ ورکړ چې خوشبختانه په افغانستان کې د پانګونې لپاره زمینه برابره شوې او زياته يې کړه موږ د کورنیو او بهرنیو سوداګرو پانګونې ته لیواله یو.
په پای کې ښاغلي عزیزی زیاته کړه د افغانستان د صنعتي کیدلو طرحه پای ته رسیدلو په درشل کې ده چې په پلی کیدلو سره به يې د برانډ امنیت خوندي شي.
