کابل ټکی کام (سه شنبه، ۲۲ کب، ۱۴۰۲ل)
د اسلامي امارت په رهبرۍ د افغان سر پرست حکومت د بهرنیو چارو وزیر “مولوي امیرخان متقي” په خپلو تازه څرګندونو کې ویلي، چې دیني او عصري زده کړې دواړه د اسلامي نظام د پرمختګ لپاره اړینې دي.
نوموړي، چې نن یې بهرنیو چارو وزارت کې د دیني احکامو او مسایلو د ښې زده کړې په مناسبت د کارکوونکو د ستایلو غونډې ته خبرې کولې وویل: دیني او عصري زده کړو دواړو ته د اسلامي نظام اړتیا ده.
یاد وزارت د ښاغلي متقي له قوله پر خپله ایکس پاڼه لیکلي: اسلامي نظام کې حکومت او سیاست دواړه د یو او بل مهمې برخې دي او په خبره یې هېواد کې باید دیني او عصري زده کړې ترسره او د وخت د غوښتنو سره سمه زمینه ورته برابره شي.
د ویلو ده، چې دا لومړی ځل نه دی، چې د اسلامي امارت مهم چارواکي د عصري زده کړو پر اړتیا ټینګار کوي، بلکې تر دې وړاندې هم مهمو امارتي چارواکو د عصري زده کړو پر اړتیا ټینګار کړی دی.
