لبنان؛ د اسرائیلي اشغالګرو هوایي برید د حزب الله ګڼو جنګیالیو ته مرګ ژوبله اړولې

کابل ټکی کام (سه شنبه، ۲۲ کب، ۱۴۰۲ل)

له لبنان ورکړل شوي راپورونه وایي، چې اسرائیلي اشغالګرو د یاد هېواد په جنوب کې د “حزب الله” غورځنګ درې مرکزونو باندې هوایي بریدونه کړي، چې په پایله کې یې د یاد غورځنګ ګڼو جنګیالیو ته مرګ ژوبله اوښتې ده.

د حزب الله غورځنګ اړوند “المنار” تلویزیون خبر ورکړی، چې د صهیونیستي ريژیم په هوایي بریدونو کې یې د یو قوماندان په ګډون ۷ جنګیالي وژل شوي او ۳۰ تنه نور ټپیان شوي دي.

د المنار تلویزیوني شبکې دغه راز خبر ورکړی، چې د اسرائیلو تر بریدونو وروسته یې د لبنان- اسرائیل پر پوله د صهیونیستي ريژیم شپږو اهدافو باندې د توغندیو او بې پیلوټه الوتکو بریدونه کړي او ګڼو صهیونیستي اشغالګرو پوځيانو ته مرګ ژوبله اړولې ده.

د اسرائیلي پوځ ویاند د بریدونو مسؤلیت منلی او په خبره یې وروستي بریدونه یې د حزب الله غورځنګ د تېرې شپې د توغندیزو بریدونو په غچ کې ترسره کړي. د اسرائیلي پوځ ویاند منلی، چې د حزب الله د تېرې شپې بریدونو کې یې ۲ پوځیان او ۵ ملکي وګړي وژل شوي او یو شمېر نور ټپیان شوي دي.

د ویلو ده، چې د تېرې کال د اکتوبر له ۷ مې نېټې راهیسې د لبنان- اسرائیلو پر پوله د حزب الله مقاومتي غورځنګ او صهیونیستي اشغالګرو ترمنځ خونړۍ نښتې روانې دي، چې په پایله کې یې دواړو لوریو ته درانه ځاني تلفات اوښتې دي.