کابل ټکی کام (چهارشنبه، ۲۳ کب، ۱۴۰۲ل)
د العربیه تلویزیوني شبکې د خبر له مخې په لبنان د اسرائیلي اشغالګرو هوایي برید کې د حماس اسلامي غورځنګ د پوځي څانګې “القسام” یو مهم قوماندان “هادي مصطفی” شهید شوی دی.
د حزب الله اسلامي غورځنګ اړوند “المنار” تلویزیوني شبکې هم خبر ورکړی، چې د حماس غورځنګ دغه لوړ پوړی قوماندان د لبنان په جنوبي “طیره” سیمه کې د صهیونیستي اشغالګرو د بې پیلوټه الوتکې په برید کې شهید شوی دی.
العربیه تلویزیوني شبکې د حماس غورځنګ د سرچینو په حواله ویلي، چې هادي مصطفی د القسام کنډک پورې اړه درلوده او د یادې لېوا د لوژستیکي ملاتړ دنده یې پر غاړه لرله.
دا په داسې حال کې ده، چې څه موده وړاندې د اسرائیلي اشغالګرو په هوایي برید کې د لبنان په پلازمېنه بېروت کې د حماس غورځنګ یو بل لوړ پوړی قوماندان “صالح العاروري” هم په شهادت رسیدلی و.
د ویلو ده، چې د لبنان- اسرائیلو پر پوله نن هم د حزب الله ځواکونو او صهیونیستي اشغالګرو ترمنځ خونړۍ نښتې روانې دي او د اسرائیلو ترهګر ریژیم د حزب غورځنګ درې مرکزونو باندې هوایي بریدونه کړي، چې په پایله کې یې د حزب الله غورځنګ شل تنه جنګیالي وژل شوي او ګڼ شمېر نور ټپیان شوي دي.
