کابل ټکی کام (یکشنبه، ۱۲ وری، ۱۴۰۳ل)
په غزه کې د بېړني اوربند په تړاو د ملګرو ملتونو امنيت شورا له پرېکړې سربېره اسرائيلو خپلو وحشتونو او ظلمونو ته دوام ورکړی.د اسلامي امارت په غزه کې د صهيونيستي رژيم بريدونه غندي او له نړۍ په ځانګړې ډول اسلامي هيوادنو غواړي چې د دغه بشري جنايت مخه ونيسي او د غزې خلکو ته مرستې ورسوي.د اسلامي امارت وياند مولوي ذبيح الله مجاهد: (( نور بايد د غزې ظلم په ټولييزه توګه پای ته ورسېږي او ژر تر ژره دې اسرائيلي ځواکونه له غزې ووځي. د دې لپاره ټول هيوادونه مسئوليت لري؛ اسلامي هيوادونه ځانګړي مسئوليت لري، چې لاسونه سره ورکړي او د دغه ظلم پر وړاندې په جديت سره ودرېږي.))ښاغلي مجاهد وايي: امريکا او غربي ټولنه چې تل د خپلو موخو ترلاسه کولو لپاره د بشري حقونو د نقض په نامه په نورو هيوادونو کې لاسوهنه کوي، خو په غزه کې د اسرائيلو د جنايتونو او بشر ضد کړنو ملاتړي او شريک دي.ذبيح الله مجاهد د اسلامي امارت وياند وايي ،چې (( په خپله د يوه لوی بشري جنايت چې په غزه کې روان دی د هغې ترشاه ولاړ ده او ملاتړ يې کوي، وسلې ورکوي، د اسرئيلو ملاتړ کوي، چې دا د دولتي ترورزيم او جنايت او بشري ظلم او زياتي سره مرسته ده او دغه چاره د غربي ټولنې اصلي څېره نړۍ ته ورښيي.))ورته مهال د عدالت نړيوالې محکمې له اسرئيلو غوښتي، چې فلسطينيانو ته د مرستو رسولو لپاره اړين ګامونه پورته کړي او په يوه مياشت کې د ننه د محکمې د حکم د تطبيق راپور ورکړي.د عدالت نړيوالې محکمه: (( اسرائيل دې له ځنډ پرته ټول اړين اقدامات وکړي، چې د خوراکي او روغتيايي توکو، اوبو او تېلو په ګډون لومړني خدمات او بشري مرستې جګړه ځپلو فلسطينيانو ته ورسېږي. د اسرائيلو پوځ دې د وژنې جرمونو مخنيوي او مجازاتو کنوانسيون خلاف په غزه کې د فلسطينيانو د حقونو څخه سرغړونه نه کوي.))د يادونې وړ ده، چې د ۲۰۲۳ م کال د اکتوبر له اوومې نېټې راهيسې د اسرائيلو په بريدنو او بمباريو کې تردې مهاله له ۳۲ زره زيات فلسطينيان شهيدان، له پنځه اويا زره زيات چې ډېره برخه يې مېرمنې او ماشومان دي ټپيان او سلګونه زره نور، چې کورونه يې د بمباريو له امله په کنډوالو بدل شوي د سيمو پرېښودو ته اړ شوي دي.
