د سوریې پلازمېنه دمشق کې درنې چاودنې؛ ګڼو کسانو ته مرګ ژوبله اوښتې
کابل ټکی کام (دوشنبه، ۱۳ وری، ۱۴۰۳ل)
د سوریې دولتي تلویزیون خبر ورکړی، چې شیبه وړاندې د یاد هېواد په پلازمېنه دمشق کې درنې چاودنې شوي، چې په پایله کې یې ګڼو کسانو ته مرګ ژوبله اوښتې ده.
د سوریې دولتي تلویزیون وایي، چې تر چاودنو وړاندې سیمه کې د اسرائیلي اشغالګرو بې پيلوټه الوتکې لیدل شوي، چې درې یې د سوریې د وسله والو ځواکونو د هوایي دفاع سیستم ویشتلي او پاتې نورو یې د مشق ته څېرمه پر دوه پوځي مرکزونو باندې بمبارۍ کړي دي.
که څه هم د سوریې دولتي تلویزیون د اسرائیلو په وروستیو بریدونو کې د اوښتې مرګ ژوبلې دقیق ارقام نه دي څرګند کړي؛ خو د سوریې د بشري حقونو لندن میشتي سازمان د یوې اعلامیې په خپرولو سره ادعا کړې ده، چې د اسرائیلو په بریدونو کې د سوریې د وسله والو ځواکونو ۱۶ تنه غړي وژل شوي او لسګونه نور ټپیان شوي دي.
د ویلو ده، چې وړمه ورځ هم د سوریې د “حلب” هوایي ډګر ته څېرمه د یاد هېواد څو پوځي مرکزونه اسرائیلي نیواکګرو په نښه کړي و، چې په پایله کې یې ۱۵۰ تنه پوځيان ووژل شول او نږدې ۳۰۰ نور ټپیان شوي وو.
