م.ی.شهیدزوی
له کله راهیسې، چې اسرائیلي بې وطنو د امریکا په لمسون د فلسطین په غزې وحشیانه عملیات پیل کړي شاوخوا شپږ میاشتې کیږي او په دې موده کې یې تراوسه دېرش زره مؤمنان په شهادت رسولي، چې ډېری یې ښځې او ماشومان دي. او دا لړۍ د وحشت په انتهاکې لاهم همداسې روانه ده.
جالبه داده، چې دا وحشتونه په غزه کې تمریني او په بېلابېلو ډولونو ترسره کیږي؛ په روغتونونو بیابیا هوایي او ځمکني عملیات او مرستوته په راټولوشویو او په پناه ځایونو مکرر او قصدي بمبار خو عادي خبره ګرځېدلې. په دې ټولو وحشتونو، چې امریکا/اسرائیل یې په غزه کې کوي، یوه ورځ هم امریکایي/اسرائیلي څارویو حتی د اندېښنې څرګندونه هم ونه کړه، بلکې ویاړیې ګڼي؛ خو د ” نړۍ وال مرکزي پخلنځي” په نوم د خیریه (!) بنسټ په کارکوونکو ـ چې بې له شکه جاسوسان به هم ول ـ د تېرې دوه شنبې د ورځې بریدکې، چې ۷ تنه غیر مسلم (امریکایي، کاناډایي او استرالیایي) وګړي په کې وژل شوي، امریکا/اسرايلو نه یوازې بښنه وغوښته بلکې په راتلونکې کې یې د بیا داسې پېښو د نه تکرار، چې غیر مسلم وګړي په کې وژل کیږي، ډاډ هم ورکړ.
عرب واکمن، چې د عیاشۍ امله شرم هم کډه ترې کړې د خپل بادار (امریکا) د خوښۍ لپاره له ذلت څخه ډکه چوپتیا غوره کړې؛ نوځکه داسې سپکاویو او له حقارت نه ډکو پېغورونوسره عادت شوی دي. او بل داچې غزه کې مؤمنان وژل کیږي او دوی خو امریکا پال دي، نوځکه یې پردي بولي. ګنې چې دیوچا دومره حیوانات هم ووژل شي والله، چې غچ (انتقام) به یې اخلي.
عرب واکمن غلامان هغه وخت هم غلي پاتې شول کله، چې تېره اوونۍ د ملګرو ملتونو د امنیت شوری دائیمي غړو، چې ټول کفاردي د یوې پرېکړې له مخې په اسرائيلو د جګړې درولوغږ وکړ.
د ابابیلو بل دوران په اسرائیل راوله
بیا عذابونه له اسمان په اسرائیل راوله
له دې عرب منافقینونه مو طمعه نه شي
ناټوځپوونکي طالبان په اسرائیل راوله.
