کابل ټکی کام (جمعه، ۷ ثور، ۱۴۰۳ل)
د فلسطيني رسنيو د راپورونو له مخې له اوږده ځنډ وروسته غزه کې د حماس اسلامي غورځنګ پوځي قوماندان او د اسرائيلو پر وړاندې د جګړې رهبري کوونکي” يحيي سنوار” د جګړې ليکي له نږدې ليدلي او خپلو ځواکونو ته يې د اسرائيلي نيواکګرو د ماتې او د فلسطيني ولس د بريا مبارکې ويلې ده. فلسطيني رسنيو خبر ورکړی، چې يحيی سنوار د غزې تړانګې په جنوبي “خان يونس” سيمه کې د جګړې ليکې له نږدې کتلي د خپلو ځواکونو لوړ مورال يې ستايلي او جنګي قوماندانانو ته يې لازمې لارښوونې کړي دي. فلسطيني رسنيو هغه انځورونه هم خپاره کړي، چې يحيي سنوار د خپلو ځواکونو په منځ کې ليدل کېږي. دا په داسې حال کې ده، چې صهيونيستي ريژيم يحيي سنوار پر اسراييلو د تېر ۲۰۲۳م کال د اکتوبر د ۷ مې نېټې د خونړيو بريدونو طراح ګڼي او د جګړې له ټولو ستر هدف يې د نوموړي له منځه وړل بللي دي. د ويلو ده، چې په غزه کې د حماس-اسرائيلو د جګړې ۲۰۰ ورځې په پوره کېدو دي،صهيونيستي ريژيم تر اوسه هېڅ نظامي او سياسي بريا نه ده خپله کړې؛ خو د کتونکو په باور د حماس اسلامي غورځنګ په ګډون د فلسطين ټولې مقاومتې ډلې له نظامي او سياسي پلوه برلاسې دي، په سيمه ييزه او نړيواله کچه صهيونيستي ريژيم د انزوا په حالت کې دی.
