کابل ټکی کام (دوشنبه، ۱۰ ثور، ۱۴۰۳ل)
حماس اسلامي غورځنګ یوځل بیا اسراییلو سره د خبرو لپاره خپل شرایط وړاندې کړي. حماس وایي له غزې په بشپړه توګه د اشغالګرو صهیونیستي پوځیانو له وتلو او د یو دایمي اوربند له رامنځته کېدو وروسته د بندیانو په تبادلې خبرو ته چمتو یو. د حماس غورځنګ ویاند او د مرکچي پلاوي غړي”عبداللطيف القانوع”د مصر پلازمېنه “قاهره” کې یوې خبري ناستې ته د خبرو پر مهال ویلي، چې زموږ دریځ نه بدلیدونکی دی او اسراییل اړ دي، چې د خپلو بندیانو د خوشې کولو لپاره زموږ غوښتنې ومني.د حماس اسلامي غورځنګ دغه لوړ پوړي غړي د خپلو خبرو پر دوام ویلي، چې که غوښتنې یې و نه منل شي د اشغالګرو پر وړاندې وسله والې او سیاسي مبارزې ته دوام ورکوي او په خبره یې اسراییلي نیواکګرو غزه کې خپل روحیات بایللي او د مقاومت د ځواکونو روحیات غښتلي دي او په ډېره مېړانه له خپلې خاورې او خلکو دفاع ته دوام ورکوي. نوموړي ویلي، چې خپل شرطونه یې منځګړو هېوادونو ته وړاندې کړي او که ونه منل شي هېڅ تړون به بریالی نه شي. د ویلو ده، چې د حماس دغه لوړ پوړي غړي ټینګار کړی هغه څه چې نیواکګرو په تېرو اوو میاشتو کې په ورانیو او ډله ایزو وژنو سره ترلاسه نکړای شول د خبرو پر ميز او د جګړې په اوږدولو کې یې هم نه شي تر لاسه کولی.
