حسان مجاهد
الله تعالی په جمعه کې يو داسي ساعت پيدا کړی دی چې هره دعا په کې قبليږي او دغه ساعت يې له خپلو بندګانو څخه له دې کبله پټ کړی دی چې دوی په ټوله جمعه کې الله تعالی ته متوجه شي او غفلت اختيار نه کړي، خو د امت ډېر علماء کرام پر دې باور دي چې ددعا دقبولیت دغه ساعت د جمعې په ورځ د مازيګر له لمانځه وروسته تر لمر لوېدو پوري ډېر احتمالي دی؛ ځکه نو دوی به هم په همدغه وخت کې ددعا ډېره هڅه کوله.
ابن قيم رح وايي: د جمعې په ورځ له مازيګر وروسته دغه ساعت ته د هر ملت کسان ډېر درناوی لري.(زاد المعاد ١ / ٣٨٢)
ابن عساكر رح ليکي: کله چې صلت بن بسطام رح ته د سترګو ړوندوالی ورسيدو؛ نو د جمعې له مازيګر وروسته يې ملګري کېناستو او د نوموړي لپاره يې دعا پيل کړه، لمر لا نه وو ډوب شوی چې الله تعالی یې سترګې بیرته خپل روغ حالت ته وګرځولې.(تاريخ دمشق)
سعید بن جبير رح به د جمعې په ورځ له مازيګر وروسته په دعا مشغوله شو او تر لمر لوېدو پوري به يې له هيچا سره خبرې نه کولې. (زاد المعاد ١ / ٣٨٢)
طاووس بن کیسان رح به د جمعې له مازيګر وروسته مخ پر قبله کېناست، دعا به يې شروع کړه او له چا سره به نه غږیده.(تاريخ واسط)
مفضل بن فضاله رح به چې کله د جمعې په ورځ د مازيګر لمونځ ادا کړ؛ نو يوازي به په مسجد کې کیناستل او تر لمر لوېدو پوري به يې دعا کوله.(أخبار القضاة)
موږ مسلمانان نن له یوې خوا په ډول ډول ګناهونو، ستونزو او مشکلاتو کې را ګير يو، خو بل طرفته بیا له الله تعالی څخه غافله يو، د جمعې په قیمتي ورځ ددې په ځای چې ددعا دقبولیت پرمهال الله تعالی ته ژړا او زارۍ وکړو؛ د خپل نفس د خوشحاله کولو لپاره که عام خلګ دي که خواص(علماء، طالبان او مجاهدين)، تفريحي ځايونو ته د منظرو په موخه ځو او هلته د ماشومانو په څېر خپل طبعيتونه برابروو.
چهل سال عمر عزیزت ګذشت
مزاج تو از حال طفلي نګشت!
