د فلسطنیانو سخت مقاومت؛ صهیونیستي یرغلګر د غزې او رفح له مهمو سیمو شاتګ ته اړ شوي

کابل ټکی کام (دوشنبه، ۲۴ ثور، ۱۴۰۳ل)
د المیادین خبري آژانس د خبر له مخې د غزې تړانګې په مختلفو سیمو کې د مقاومت د ځواکونو او صهیونیستي اشغالګرو ترمنځ سختې نښتې روانې دي.د حماس اسلامي غورځنګ د پوځي څانګې “القسام” لیوا یو سیمه ییز قوماندان المیادین ته ویلي، چې د مقاومت ځواکونو په تېره یوه اوونۍ کې د صهیونیست ريژیم ۳۵ ټانکونه او نور زغروال وسایط ویجاړ کړي، چې په پایله کې یې اسراییلي پوځ ته درنه مرګ ژوبله اوښتې ده.د حماس دغه سیمه ییز قوماندان چې نوم یې نه دی په ډاګه شوی ادعا کوي، چې د فلسطین د مقاومتي ډلو جنګیالي په لوړ مرال جګړه کوي او دوښمن یې د رفح ښار له یو شمېر مهمو سیمو شاتګ ته اړ کړی دی. له بل پلوه د حماس غورځنګ د پوځي څانګې ویاند “ابو عبیده” المنار” تلویزیوني شبکې ته ویلي، چې ځواکونو یې د غزې مرکزي “الزیتون” سیمه کې د صهیونیست پوځ پرې یوې پوځي قرارګاه د توغندیو او بې پیلوټه الوتکو بریدونه کړي، چې په پایله کې یې د دوښمن یاد مرکز ویجاړ او ګڼ پوځیان وژل شوي دي. د یادونې وړ ده، چې اسراییلي رسنیو هم خبر ورکړی، چې غزه کې یې ۳۰ پوځیان ټپیان شوي، چې له ډلې یې د ۶ تنو حالت د اندیښنې وړ ښودل شوی ده.