کابل ټکی کام (دوشنبه، ۱۴ غبرګولی، ۱۴۰۳ل)
د قزاقستان ولسمشر “قاسم جومارت توقایف” اعلان وکړ، چې د افغانستان اسلامي امارت “طالبان” یې د ممنوعه ډلو له لیسته ایستلي دي.د قزاقستان د دولتي خبري اژانس د راپور له مخې، ولسمشر توقایف دغه څرګندونې د ګډ امنیتي تړون د سازمان د غړو هېوادونو له مشرانو سره په کتنه کړي دي. نوموړي ټینګار کړی، چې دغه اقدام له افغانستان سره د اقتصادي اړېکو د پراختیا په موخه شوی دی. ولسمشر توقایف ټینګار وکړ، چې په اوسني پړاو کې یو له ستراتیژیکو کارونو څخه په سیمه ییزو اړیکو کې د افغانستان فعاله ونډه ده.د روسیې د بهرنیو چارو وزیر “سرګي لاوروف” په دې وروستیو کې په یوه مرکه کې ویلي و چې هیواد یې د منعه شویو ډلو له لېست څخه د افغانستان د اسلامي امارت د ایستلو په لټه کې دی. دا په داسې حال کې ده، چې په دې وروستیو کې د روسیې ولسمشر “ولادیمیر پوتین” اسلامي امارت «د ننني افغانستان واقعیت» بللی او ویلي یې و، چې «موږ باید په یو ډول له هغوی سره اړېکې وساتو.
