کابل ټکی کام (یکشنبه، ۲۰ غبرګولی، ۱۴۰۳ل)
د المیادین خبري آژانس د خبر له مخې د سوریې په “دیرالزور” ولایت کې د حکومت مخالفو وسله والو په یوه مرکز د موټر بم برید شوی، چې په پایله کې یې د لومړنیو مالوماتو له مخې د یوې حکومت مخالفې وسله والې ډلې د یو مهم قوماندان په ګډون ۶ تنه وژل شوي او لسګونه نور ټپیان شوي دي. د سوریې دولتي تلویزیون خبر ورکړی، چې دغه چاودنه د “دیر الزور” ولایت په “القسور” سیمه کښې رامنځته شوې او د ځاني زیانونو سربیره یې پراخ مالي زیانونه هم اړولي دي. د سوریې یوې استخباراتي سرچینې چې نه یې غوښتل نوم یې څرګند شي “المیادین” ته ویلي، چې برید د “تحریرالشام” په نامه د حکومت مخالفې وسله والې ډلې په مرکز ترسره شوی ده. یاده سرچینه برید کې د سوریې د حکومت لاس لرل رد کړي او په خبره یې برید ښایي داعش وسله والې ډلې ترسره کړی وي. د یادونې وړ ده، چې تحریرالشام وسله والې ډلې هم د برید پخلی کړی؛ خو پکې د اوښتو زیانونو په هکله یې تر اوسه څه نه دي ویلي.
