کابل ټکی کام (یکشنبه، ۲۰ غبرګولی، ۱۴۰۳ل)
له یمن ورکړل شوي راپورونه وایي، چې تېره شپه د یاد هیواد د پلازمینې “صعنا” په ګډون په یو شمېر سیمو امریکایي او برېتانوي اشغالګرو هوایي بریدونه کړي، چې په پایله کې یې لسګونو کسانو ته مر ګ ژوبله اوښتې ده. د مقاومت اړوند “المیادین” خبري آژانس د یمني چارواکو په حواله ویلي، چې امریکایي-برېتانوي اشغالګرو صنعا، مارب او تعز ولایتونو کې ځینې پوځي او ملکي اهداف په نښه کړي، چې په پایله کې یې ۱۷ تنه شهیدان او ۵۳ نور ټپیان شوي دي. یمني سرچیني وایي، چې امریکایي اشغالګرو پلازمینه “صنعا” او مارب ولایتونو کې د یمن د وسله والو ځواکونو شپږ اډې په نښه کړي چې په پایله کې یې ۱۰ پوځیان شهیدان او ۳۳ نور ټپیان شوي دي. یمني سرچینو دغه راز خبر ورکړی، چې په ” تعز” ولایت هم اشغالګرو هوایي بریدونه کړي او یو جومات یې په نښه کړی، چې په پایله کې یې ۷ تنه لمونځ کوونکي شهیدان او لسګونه نور ټپیان شوي دي. د یادونې وړ ده، چې امریکایي او برېتانوي اشغالګر وروسته له هغه پر یمن وحشیانه بریدونه کړي، چې د یمن وسله والو ځواکونو په تېرو درې ورځو کې د سره سمندر او عربي بحیرې په مربوطاتو کې د امریکا، برېتانیا او اسرائیلو شپږ هغه بېړۍ وویشتلې، چې د اشغالي فلسطین بندرونو ته روانې وې.
