کابل ټکی کام (چهارشنبه، ۲۳ غبرګولی، ۱۴۰۳ل)
د افغانستان د اسلامي امارت د بهرنیو چارو وزارت د یوې اعلامیې په خپرولو سره په غزه کې د جګړې د بندېدو په تړاو د ملګرو ملتونو وروستی پرېکړه لیک مثبت ګام بللی دی. اعلامیه کې راغلي: د افغانستان اسلامي امارت د بهرنیو چارو وزارت په غزه کې د جګړې د پایته رسولو په موخه د ملګرو ملتونو د امنیت شورا د وروستي پریکړه لیک تصویب د غزې د خلکو د نسل وژنې د پای ته رسولو لپاره یو لومړنی او مثبت ګام بولي،
چې په غزه کې د دایمي اوربند د رامنځته کولو او د غزې د خلکو لپاره عادي ژوند ته د زمینې برابرولو لپاره رښتینې خبرو اترو ته اړتیا لري. اعلامیه کې یادونه شوې ده، چې د اسلامي امارت د بهرنیو چارو وزارت د صهیونیستي رژیم د جنایتونو د غندلو تر څنګ، د فلسطین د خلکو د یو خپلواک هېواد د درلودلو له تاریخي حق څخه ملاتړ کوي.
