کابل ټکی کام (جمعه، ۲۵ غبرګولی، ۱۴۰۳ل)
د افغانستان اسلامي امارت زعیم “شیخ القرآن والحدیث مولوي هبة الله اخندزاده” د نېکمرغه لوی اختر د رارسېدو په مناسبت د مبارکۍ په پیغام کې د نورو ګڼو موضوعاتو تر څنګ د فلسطین د قضیې اړوند هم څرګندونې کړي او په نړېوالو یې غږ کړی دی، چې غزه کې دې د صهيونيستانو د جرمونو پر وړاندې خپل مسوليت ترسره کړي.
د اسلامي امارت زعیم په خپل اختریز پیغام کې ویلي: د فلسطین په غزه او نورو سیمو کې په مېرمنو، ماشومانو او مظلومو مسلمانانو د اسرائیلي صهیونیستانو بریدونه او ظلمونه یوځل بیا په سختو الفاظو بدبولو “غندنه” یې کوو او له نورو ملکونو څخه هم غواړو چې د دې ستر جنایت او وحشي مظالمو د مخنیوي په برابر په سمه توګه خپل مکلفیت ادا کړي.
د یادونې وړ ده، چې د افغانستان د اسلامي امارت زعیم داسې مهال په خپل اختریز پیغام کې په نړیوالو غزه کې د صهیونیستي اشغالګرو د روانو وحشتونو د مخنیوي غږ کوي، چې غزه کې روانه خونړۍ جګړه اتمې میاشتې ته دا خلېدونکې ده، د ښځو او ماشومانو په ګډون لسګونه زره فلسطینان پکې شهیدان، زرګونه نور ټپیان شوي، د غزې ۷۰ سلنه آبادي په بشپړه توګه ویجاړه شوې او نږدې دوه میلیونه فلسطنیان د خپلو مېنو پرېښودلو ته اړ شوي؛ خو نړېوالو په ځانګړې توګه اسلامي هېوادونو غزه کې د صهیونیستي ريژیم د روانو وحشتونو پر وړاندې لکه څنګه چې پکار وه خپل مکلفیت نه دی ترسره کړی.
