کابل ټکی کام (سه شنبه، ۱۲ چنګاښ، ۱۴۰۳ل)
د یمني حوثیانو بنسټګر او روحاني مشر “عبدالمالک حوثي” په خپلو تازه څرګندونو کې ویلي، چې غزه کې اسرائیلي اشغالګرو ماته خوړلې او که د حماس-اسراییلو ترمنځ روانې خبرې بریالۍ هم شي دا د جکړې پای ته رسېدل نه بلکې د اسراییلو تېښته ده. نوموړي، چې “المیسره” تلویزیوني شبکې سره یې خبرې کولې وویل: زموږ سمندري ځواکونه هره ګړۍ په سره سمندرګي، عربي بحیرې، عدن خلیج، بحرین سمندر او هندي سمندر کې د امریکا، برېتانیا، اسرائیلو او د نورو هغو هیوادونو د بېړیو ویشتلو ته چمتو دي، چې د اشغالي فلسطین بندرونو ته روانې وي او صهیونیستي ريژیم ته وژونکې وسلې او نور د اړتیا وړ مواد لېږدوي. د حوثي په خبره هره هغه بېړۍ یې مشروع هدف ده، چې په یوه نه یوه ډول صهیونیستي ترهګر ريژیم سره اړېکې لري.د یادونې وړ ده، چې نوموړي خبرداری ورکړی، که د اسرائیلو او امریکا سخت دریځي او حماقت دوام وکړي موږ د جګړې څلورم پړاو ته چمتویو او د فلسطیني ولس ملاتړ ته به دوام ورکوو.
