کابل ټکی کام (شنبه، ۱۶ چنګاښ، ۱۴۰۳ل)
د راپورونو له مخې په لبنان کې د حماس اسلامي غورځنګ یو لوړ پوړي پلاوي د لبنان د حزب الله غورځنګ له مشر “حسن نصرالله” سره لیدلي او دواړو لوریو صهیونیستي ريژیم سره د جګړې پر دوام ټینګار کړی دی. د حزب الله اړوند “المنار” تلویزیوني شبکې خبر ورکړی، چې د “اسامه حمدان” په مشرۍ د حماس غورځنګ یو لوړ پوړي پلاوي “بیروت” کې حسن نصرالله سره کتلي او د اسرائیلو سره د ممکنه اوربند په ګډون یې په ګڼو موضوعاتو ورسره خبرې کړي دي. المنار تلویزیوني شبکې خبر ورکړی، چې د حماس پلاوي د اسرائیلو او اشغالي فلسطین پر پوله د حزب الله ځواکونو له لوري په صهیونیستي اهدافو د حزب الله د بریدونو ستاینه کړې او یاد غورځنګ ته یې ډاډ ورکړی، چې د لبنان په جنوب د اسرائیلو د حملې په صورت کې به په لبنان کې د مېشتو فلسطیني ډلو جنګیالي د حزب الله ځواکونو په ملاتړ په جګړه کې برخه اخلي. د یادونې وړ ده، چې نږدې دوه میاشتې وړاندې د حماس اسلامي غورځنګ یو لوړ پوړي پلاوي د یمن پلازمینې “صنعا” ته سفر کړی و او هلته یې د یمني چارواکو سره د اسرائیلو پر وړاندې د همغږی جګړې په دوام خبرې اترې کړې وې.
