کابل ټکی کام (یکشنبه، ۲۴ چنګاښ، ۱۴۰۳ل)
د امریکا مخکنی ولسمشر او راتلونکو ټاکنو ته نوماند «دونالډ ټرمپ» د ډزو له امله ټپي شوی دی.
د امریکايي رسنیو د خبر له مخې، دا پېښه په «پنسلوانیا» ایالت کې یوې ټاکنیزې غونډې ته د ترمپ د وینا پر مهال شوې ده. ویل کېږي چې ټرمپ له ډزو وروسته پر ځمکه پرېوتلی او وروسته امنیتي کسانو له ګڼېګوڼې ایستلی دی. د پېښې په عکسونو کې هم لیدل کېږي چې د ټرمپ له یو غوږ او مخ وینې روانې دي.
په ورته وخت کې د پخواني ولسمشر ویاند د ټرمپ روغتیايي وضعیت ښه بللی دی.
د ټرمپ او اوسني ولسمشر، جو بایډن ترمنځ سیالي روانه ده، خو د ځینو کارپوهانو په باور چې د دغه هېواد د ۲۰۲۴ کال د ولسمشرۍ ټاکنې به دونالد ترمپ وګټي.
دا یادونه هم ضروري ده چې ترمپ په ټاکنیزو غونډو کې د بایډن پالیسي په خورا جدي ډول ننګوي.
