کابل ټکی کام (چهارشنبه، ۲۷ چنګاښ، ۱۴۰۳ل)
غزه کې د حماس اسلامي غورځنګ لوړ پوړي پوځي قوماندان “یحیی سنوار” په خپلو تازه څرګندونو کې د حماس غورځنګ په مرکچیانو غږ کړی، چې په مذاکراتو کې تنازل مکوئ ځکه، چې موږ یوې تاریخي او پایله لرونکې جګړه کې ښکیل یو. الجزیرې نړیوالې تلویزیوني شبکې د یحیی سنوار له قوله ویلي: د حماس غورځنګ په سیاسي مشرتابه غږ کوم، چې مذاکراتو کې تنازل مکوئ، موږ یوه تاریخي او سخته جګړه د اشغالګرو صهیونستانو په مقابل کې پیل کړې او هره ورځ درانه تلفات وراړوو. یحیی سنوار د خپلو خبرو پر دوام یوځل بیا ټینګار کړی، چې له غزې د وروستي صهیونیستي اشغالګر تر وتلو به خپل وسله وال مقاومت ته دوام ورکوي. د یحیی سنوار په خبره: د ځواکونو مرال یې غښتلی دی او د صهیونیستي غاصب او ترهګر ريژیم پوځیانو یې پر وړاندې ماته خوړلې ده. نوموړي ویلي، چې د ټولې اسلامي نړۍ د ولسونو ملاتړ ورسره دی او دا مهال یې په لیکو کې د نورو اسلامي هیوادونو ځوانان هم د اسرائیلي غلیم پر وړاندې جګړه کوي. یحیی سنوار که څه هم د یادو جنګیالیو د هویت په هکله څه نه دي ویلي؛ خو په خبره یې کله یې چې وخت راشي هر څه به په ډاګه کړي. نوموړي دغه راز د یمني ځواکونو، حزب الله غورځنګ او د عراق د اسلامي مقاومت د ځواکونو څخه مننه کړې، چې په دې سختو شرایطو کې د دوی تر څنګ ولاړ دي. د یادونې وړ ده، چې د حماس اسلامي غورځنګ دغه لوړ پوړی قوماندان داسې مهال دا څرګندونې کوي، چې د قطر، مصر او ځینو نورو هیوادونو له لوري د حماس غورځنګ او اسرائیلو ترمنځ یوځل بیا د خبرو اترو د پیلولو لپاره هڅې روانې دي.
