کابل ټکی کام (یکشنبه، ۱۴ زمری، ۱۴۰۳ل)
د افغان مؤمن او متدين ولس له لوري، د فلسطين له مجاهد ولس سره د «الاقصي مسجد» د آزادۍ د مخکښ او پېژندل شوي سالار اسماعيل “هنيه” تقبله الله د شهادت په مناسبت، د غمرازۍ شريکولو په موخه، پرون د کابل ښار په عيدګاه جامع جومات کې د قرآنکريم د ختم او دعا مراسم ترسره شول.
په دغو مراسمو کې چې د افغانستان د اسلامي امارت مقاماتو او مسئولينو، علماء کرامو او زرګونو هېوادوالو او مجاهدينو ګډون کړی و؛ د امام محمد شيباني مدرسې مهتمم شيخ فضل الله نوري وويل ،چې تاريخ د تکرارېدو په حال کې دی او نړۍ پر غزې راټوله شوې او د فلسطينيانو پر وړاندې ډول ډول بشري ضد جنايتونه ترسره کوي او د صهيونيستي اشغالګرو جنايتونه ګوري.
شيخ نوري زياته کړه: تاريخ به دا ثبت کړي چې عربي نړۍ او يو شمېر اسلامي هيوادونه، سره له دې چې ټول امکانات په واک کې لري؛ خو د فلسطيني آزادي غوښتونکو هېڅ ډول ملاتړ نه کوي؛ خپل مرزونه يې د مجاهدينو پر مخ تړلي او د غزې پر مظلومو مسلمانانو د غرب او صهيونيستي رژيم ظلمونه او جنايتونه ننداره کوي.
د ده په وينا، که څه هم د شهيد اسماعيل “هنيه” ترور د هر مسلمان زړه ټپي کړ؛ خو په ټوله نړۍ کې يې د مسلمانانو د بيدارۍ څپه را ژوندۍ کړې ده.
دغه راز، په کابل ښار کې د عبدالرحمن جامع مسجد خطيب مفتي محمود ذاکري وويل چې د صهيونيستي اشغالګرو له خوا د اسماعيل “هنيه” شهادت، د ټولو مسلمانانو لپاره وياړ دی او د نړۍ د مسلمانانو ترمنځ به د يووالي او قوت او همدا رنګه له اشغال څخه د فلسطين د بشپړې آزادۍ سبب شي.
د کابل پوهنتون استاد پوهنمل ډاکټر سيد روضت الله مجيد په خپلو خبرو کې وويل چې د غزې غيورو مسلمانانو او په ځانګړې توګه د حماس جهادي غورځنګ وښوده چې د قدس د آزادولو يوازېنۍ لاره جهاد دی او په جهاد او قربانيو سره، د صهيونيستي اشغالګرو د استعمار پای ته رسول شوني دي.
نورو ويناوالو هم په خپلو خبرو کې، مسلمانانو ته د «الاقصي مسجد» اهميت بيان کړ؛ د فلسطينيانو د برحقې مبارزې او قربانيو ستاينه يې وکړه او د نړۍ پر ټولو مسلمانو يې غږ وکړ چې د فلسطينيانو ترڅنګ ودرېږي او له صهيونيستي اشغال څخه د فلسطين د آزادولو په لاره کې دې خپله اسلامي او انساني وجيبه اداء کړي
د مراسمو په پای کې د حماس جهادي غورځنګ د سياسي دفتر د مشر اسماعيل “هنيه” د شهادت په اړه د افغانستان اسلامي امارت د رئيس الوزراء ملا محمد حسن آخند د تعزيت پيغام ولوستل شو ،چې په يوه برخه کې يې داسې راغلي دي: « د ايران پلازمېنه تهران کې د اسلامي مقاومت حرکت (حماس) د سياسي دفتر د مشر اسماعيل هنية شهادت له زړه ودردولم. صهونيستي رژيم داسې مهال شهيد اسماعيل هنية په نښه کړ چې هغه د يوه حکومت مېلمه او د حماس مشر مرکچي و. د داسې يوه شخصيت په نښه کول د ټولو مروجو نړيوالو نورمونو شديد نقض دی او ښيي چې دښمنان په روانه جګړه کې هېڅ اصل ته درناوی نه لري.»
