کابل ټکی کام (دوشنبه، ۵ لیندۍ، ۱۴۰۳ل)
په داسې حال کې، چې پاکستان کې سیاسي کړکیچ دوام لري یاد هېواد کې د د پخواني لومړي وزیر “عمران خان” په مشرۍ د ستر حکومت مخالف ګوند تحریک انصاف زرګونه پلویان پلازمېنې اسلام آباد ته نږدې شوي دي.
د پاکستان مرکزي حکومت که څه هم هڅه کوي د پلازمېنې اسلام آباد د تر ټولو مهمې “دیموکراسي” څلور لارې ته د لاریون کوونکو ته ننوتلو مخنیوی وکړي او په همدې موخه یې پلازمېنې ته غځیدلې لارې په کنټینرو بندې کړي او د پوځیانو په ګډون یې ۳۰ زره امنیتي ځواکونه حساسو ځایونو کې ځای پر ځای کړي؛ خو د وروستیو راپورونو له مخې لاریون وال توانیدلي، چې خنډونه له منځه یوسي.
په ورته مهال په ډېرو ځایونو کې د لاریون کوونکو او امنیتي ځواکونو ترمنځ د خونړیو نښتو راپورونه هم ورکړل شوي دي.
د عمران خان ملاتړي له زندان څخه د خپلو مشرانو د خوشې کولو غوښتنه کوي.
د یادونې وړ ده، چې حکومت تحریک انصاف ګوند ته د خبرو اترو وړاندیز کړی؛ خو د یاد ګوند چارسمبالي مشر ګوهر علي خان یې په اړه اډیاله زندان کې له عمران خان سره مشوره کړې؛ عمران خان د لاریون د دوام ترڅنګ د خبرو اترو اجازه ورکړې ده.
