کابل ټکی کام (دوشنبه، ۵ لیندۍ، ۱۴۰۳ل)
په کندهار کې د افغانستان د ځانبسياينې د زرغون انقلاب لومړي نړيوال کنفرانس د لوړو زده کړو د سرپرست وزير شيخ الحديث مولوي نداء محمد نديم، د کرنې، اوبو لګولو او مالدارۍ د سرپرست وزير مولوي عطاء الله عمري، د لوړو زده کړو وزارت د علمي معين دوکتور لطف الله خيرخواه، د افغانستان د اسلامي امارت د مرکزي وياند مولوي ذبيح الله مجاهد، د اوبو او انرژي وزارت د تخنيکي سلاکار ډاکټر فاروق اعظم، د کندهار د والي مولوي محمد شيرين آخوند، د بېلابېلو پوهنتونونو د استازو او استادانو او د کورنيو او بهرنيو متخصصينو په ګډون سره پيل شو. د کنفرانس د پرانيستې په مراسمو کې د لوړو زده کړو سرپرست وزير شيخ الحديث مولوي نداء محمد نديم وويل ،چې د تېرو جګړو له امله د هېواد کرنيزه برخه هم زيانمنه شوې او موږ په دې هڅه کې يو ،چې د نورو برخو تر څنګ، د دې برخې ستونزو ته بنسټيزې حل لارې پيدا کړو او کرنيزه برخه پر پښو ودروو. دغه راز د کرنې، اوبو لګولو او مالدارۍ سرپرست وزير مولوي عطاءالله عمري ژمنه وکړه ،چې په دې کنفرانس کې وړاندې کېدونکې مقالې او طرحې به د خپل وزارت اړوندو برخو کې عملي کړي او اعظمي ګټه به ترې واخلي. همدا راز د اسلامي امارت مرکزي وياند مولوي ذبيح الله مجاهد د هېواد په کرنه کې د عصري وسايلو او نويو ميتودونو پر کارونې ټينګار وکړ او زياته يې کړه، چې دا ډول کنفرانسونه بايد په هر ولايت او ولسواليو کې جوړ شي. د لوړو زده کړو وزارت علمي معين دوکتور لطف الله خيرخواه وويل ،چې کرنه يوازې په کرکيله پورې نه ده تړلې، بلکې د ژوند نور مهم اړخونه هم ور پورې تړلي دي، ده زياته کړه چې په دې برخه کې د ځانبسياينې لپاره ډېر کار او ډېرو هڅو ته اړتيا ده.کنفرانس کې د کندهار والي مولوي محمد شيرين آخوند، د اوبو او انرژۍ وزارت تخنيکي سلاکار ډاکټر فاروق اعظم، د کابل پوهنتون رئيس دوکتور اسامه عزيز، بهرنيو استادانو او نورو ويناوالو د هېواد دکرنې سکټور پر پياوړتيا خبرې وکړې. د يادونې وړ ده چې دغه کنفرانس د کابل پوهنتون له لوري د کندهار ولايت انسټو پوهنتون کې پيل شو، چې په درېوو ورځو کې به د داخلي او بهرنيو استادانو له لوري شاوخوا ۸۵ څېړنيزې مقالې پکې وړاندې شي.
