کابل ټکی کام (جمعه، ۱۶ لیندۍ، ۱۴۰۳ل)
په داسې حال کې، چې په سوریه کې یوځل بیا کورنۍ جګړې زور اخیستی او د حلب په ګډون په ځینو سیمو مخالفو وسله والو ولکه کړې او لا هم د پرمختګ په حال کې دي د د سوریې دولتي تلویزیون خبر ورکړی، چې په پلازمېنه “دمشق” د اسرائیلي اشغالګرو په هوایي برید کې ۲۱ سوریایي پوځیان وژل شوي او اوګڼ نور ټپیان دي.
په ورته مهال صهیونیستي پوځ ادعا کړې، چې د سوریې د پوځ د قوماندې مرکزونه او زیربناوې یې په نښه کړې دي.
د سوریې رسمي خبري اژانس د یوې پوځي سرچینې په حواله ویلي چې برید نن جمعه ورځ سهار وختي د دمشق په څنډه کې پر یو شمېر پوځي پوستو او د ښار دننه د استوګنې پر یوې ودانۍ ترسره شوی دی.
د سوریې وسله والو ځواکونو د یوې اعلامیې په خپرولو سره ویلي، چې د هوایي دفاع سیستم یې د اسرائیلي اشغالګرو ګڼ شمېر توغندي شنډ کړي دي.
د یادونې وړ ده، چې د غزې د جګړې له پیل راهیسې پر سوریې باندې د اسرائیلو هوايي بریدونو زور اخیستی او نږدې هره ورځ صهیونیستي اشغالګر په سوریې بریدونه کوي.
