کابل ټکی کام (جمعه، ۱۶ لیندۍ، ۱۴۰۳ل)
له غزې ورکړل شوي راپورونه وایي، چې د یادې تړانګې په جنوبي “حي تل هوا” سيمه کې د حماس اسلامي غورځنګ ځواکونو د صهیونیستي اشغالګرو “۵۰” کسیزه پیاده ګزمې باندې بمي بریدونه کړي، چې په پایله کې یې ۱۶ ترهګر پوځیان وژل شوي او ګڼ شمېر نور ټپیان دي.
د حماس اسلامي غورځنګ د پوځي څانګې “القسام” لېوا یوې سرچینې د یمن دولتي تلویزیون “المیسرة” ته ویلي، چې برید یې بریالی و او د ډیری وژل شویو صهیونیستانو جسدونه لا هم په سیمه کې پاتې دي.
د یادونې وړ ده، چې صهیونیستي ترهګر ريژیم په رسمي توګه تر دې دمه د حماس غورځنګ د ادعاوو په هکله څه نه دي ویلي؛ خو ځینو اسرائیلي رسنیو غزه کې خپل لوري ته د اوښتې مرګ ژوبلې پخلی کړی دی.
