کابل ټکی کام (شنبه، ۱۷ لیندۍ، ۱۴۰۳ل)
د سوریې د دولتي تلویزیون د خبر له مخې د سوریې او روسیې جنګي الوتکو د “حمص” ښار په ځنډو کې د حکومت مخالفو وسله والو په سنګرونو خونړي هوایي بریدونه کړي، چې په پایله کې یې ګڼو کسانو ته مرګ ژوبله اوښتې او د تحریرالشام په مشرۍ حکومت مخالف وسله وال حمص ښار ته په ننوتلو کې پاتې راغلي دي.
د وسله والو ډلو یو ویاند هم د یاد خبر د پخلی ترڅنګ ویلي، چې د ځواکونو پرمختګ یې له ستونزو سره مخ دی او اوسمهال د یاد ښار په ۶۰ کلیومترۍ کې د خپلو سنګرونو په بیا جوړولو بوخت دي.
تېره شپه العربیه تلویزیوني شبکې خبر ورکړی و، چې وسله والې ډلې د حمص تر دروارزو رسیدلي دي.
په ورته مهال د سوریې دولتي تلویزیون خبر ورکړی، چې د حزب الله او د عراقي وسله والو زرګونه جنګیالي حمص ښار ته ننوتلي دي.
