عطاء الله مبارز
د افغانستان د معاصر تاریخ په اوږدو کې، شهید حاجي خلیل الرحمن حقاني د هغو شخصیتونو له ډلې و چې د هېواد په سیاسي او ټولنیزو چارو کې یې مهم نقش درلود. نوموړي د کډوالو چارو وزیر په توګه کار کاوه او د خپلې پاکې ارادې او اخلاص له امله د خلکو په زړونو کې ځانګړی ځای درلود.
حاجي خلیل الرحمن حقاني د افغانستان په یوه دينداره او بانفوذه کورنۍ کې زېږېدلی و. د هغه کورنۍ له پخوا راهيسې، د دیني او ټولنیزو خدمتونو لپاره پېژندل کيږي.
شهيد حقاني د افغانستان د جګړې او اشغال پر مهال په خپل ټول توان د اشغالګرو او داخلي بې عدالتيو پر وړاندې مبارزه وکړه. د اسلامي امارت په لومړي دور کې، حاجي خلیل الرحمن د مختلفو ټولنیزو او سیاسي مسؤلیتونو د ترسره کولو لپاره ګومارل شوی و، او تل یې هڅه کړې چې د هېواد د مظلومو خلکو لپاره یوه آرامه فضا رامنځته کړي.
د کډوالو چارو د وزیر په توګه، حاجي خلیل الرحمن د میلیونونو بې ځایه شویو افغانانو ستونزو ته د حل لارې چارې پیدا کول خپل لومړیتوب وګاڼه. هغه د کډوالو لپاره د سرپناه، خوراکي موادو او ښوونې-روزنې په برخه کې ځانګړي پروګرامونه پلي کړل. د هغه د خدمتونو له امله، ګڼ شمېر کورنيو وکولای شوای، چې خپل ژوند بیا پیل کړي او د ناامیدۍ پر ځای د هیلو ژوند غوره کړي.
حاجي خلیل الرحمن د خپل اخلاص، نرم خوی او د اسلامي ارزښتونو پر تطبیق ټینګار کولو له امله د خلکو ترمنځ ډېر محبوب و. هغه د یو ساده، پرهیزګاره او ژمن شخصیت په توګه پېژندل کېده.
د ۲۰۲۴ کال د ډسمبر پر ۱۱مه نېټه، حاجي خلیل الرحمن حقاني پلازمېنه کابل کې په یوه چاودنه کې شهید شو.
حاجي خلیل الرحمن حقاني د افغانستان په معاصر تاریخ کې د خدمت، قربانۍ او اخلاص یوه داسې نمونه ده چې تل به یې نوم ژوندی وي. د هغه ژوند موږ ته دا درس راکوي چې د ستونزو سره-سره د خپل ولس لپاره خدمت کول تر ټولو ستر وياړ دی.
