ترکیه له سوریې سره ستراتیژیک تړون لاسلیک کوي

کابل ټکی کام (دوشنبه، ۳ مرغومي، ۱۴۰۳ل)

سوریې ته د ترکیې د بهرنیو چارو د وزیر “هاکان فیدان” له سفر او هلته یې د تحریرالشام د واکمنې ډلې له مشر “ابو محمد الجولاني” سره تر کتنې وروسته ځینو ترکي رسنیو خبر ورکړی، چې انقره غواړي له دمشق سره ستراتیژیک تړون لاسلیک کړي.

ترکي رسنیو د یاد هېواد د ځینو لوړ پوړو پوځي چارواکو په حواله خبر ورکړی، چې د یاد تړون تر لاسلیک وروسته به دواړه هېوادونه په خپل مینځ کې پوځي همکارۍ پیلوي او تر ۲۰۰۰ تنو ترکي پوځیان به هم د دمشق په مهمو ځایونو کې ځای پر ځای کېږي.

د یادونې وړ ده، چې ترکیه دا مهال له اذربایجان، لیبیا، صومالیا او ځینو نورو هېوادونو سره هم ستراتيژیک تړونونه لري او زرګونه پوځیان یې یادو هېوادونو کې میشت دي.