کابل ټکی کام (چهارشنبه، ۲۰ وری، ۱۴۰۴ل)
د راپورونو له مخې، د ډومينيکن جمهوريت په پلازمېنه کې د يو نايټ کلب چت د راپريوتو له امله لږ تر لږه ۹۸ کسان مړه شوي او بېړني ټيمونه په بيړه هڅه کوي چې ژوندي پاتې شوي کسان له کنډوالو راوباسي.
پېښه تېره شپه رامنځته شوې چې شاوخوا ۱۵۵ کسان پکې ټپيان شوي هم دي.
د چارواکو په وينا، د مړو شويو کسانو په ډله کې يو مشهور سندرغاړی، د يوې ولايتې سيمې والي او پخوانی د مېجر ليګ بيسبال لوبغاړی اوکټاويو دوټيل شامل دي.
د ډومينيکن جمهوريت د بېړنيو حالاتو د عملياتو مشر، خوان مانویل مېندېز، ويلي چې لا هم دا معلومه نه ده چې د پيښې پر مهال په کلب کې څو کسان وو.
دا پېښه هغه مهال رامنځته شوه کله چې مشهور ډومينيکن ميرېنګ سندرغاړي، ربي پېرېز، هلته کنسرټ ورکاوه. د هغه د مدير او کورنۍ له مخې، ربي پېرېز هم په مړو شويو کې شامل دی. په دغه محفل کې سياستوال، ورزشکاران او نور مشهورو خلکو ګډون درلود.
د ولسمشرۍ وياند وايي: «موږ د ژغورنې وسايل زيات کړي، درانه ماشينونه مو استعمال کړل څو کنډوالې ژر لرې شي او د ژوندي کسانو د موندلو هڅې روانې دي.»
تر اوسه د چت لويدو لامل په اړه څه نه دي ويل شوي خو چارواکو ويلي، په دې اړه يې هم پلټنې پيل کړي دي.
ډومینیکن جمهوریت (Dominican Republic) یو هیواد دی چې په لوېدیځ هند یا کرېب بحیره (Caribbean Sea) کې موقعیت لري. دا هېواد د هایټي سره ګډه پوله لري او دواړه هیوادونه د هسپانیولا (Hispaniola) نومې ټاپو باندې پراته دي
پلازمېنهیې سانتو دومینګو (Santo Domingo) ده او رسمي ژبهیې هسپانوي ده. دا هېواد یو له هغو مشهورو سیاحتي ځایونو څخه دی چیرته چې خلک د سمندر، طبیعت، او تاریخي ځایونو لیدو ته ورځي.
