کابل ټکی کام (شنبه، ۳۰ وری، ۱۴۰۴ل)
د ا،ا،ا، د بهرنیو چارو وزارت وايي، چې د دغه وزارت د سرپرست مولوي امیرخان متقي له خپل پاکستاني سیال ښاغلي محمد اسحاق ډار او ورسره لوړ پوړو پلاوو ترمنځ په ګډه ناسته کې د دواړو هیوادونو ترمنځ پر مهاجرینو، سیاسي، اقتصادي، تجارتي،ټرانزیټي، سترو پروژو، او یو شمیر نورو موضوعاتو خبرې شوي دي.
بهرنيو چارو وزارت په خبرپاڼه کې ويلي، د پاکستان په شمول له ټولې نړۍ سره مثبتې او پر متقابل احترام ولاړې اړیکې غواړي او پاکستان سره يې د تچارت، ټرانزیټ او ګډو پروژو پراختيا ته ليوالتيا ښودلې او دغه راز يې په يادو برخو د اسانتياو رامنځته کولو او د مهاجرينو پر جبري اخراج خپله اندېښنه څرګنده کړې او له پاکستاني چارواکو يې غوښتي چي هلته د میشتو او راتلونکو افغانانو د حقونو د ضایع کېدو مخنیوی وکړي.
نوموړي د ا.ا.ا. بهرنیو چارو وزیر ته بلنه ورکړه چي پاکستان ته رسمي سفر وکړي تر څو د لوړې کچې راشه درشه دوام پیدا کړي.
ښاغلي ډار وویل؛ د دې لپاره چې دوه اړخیز تجارت وده وکړي پر زیات شمیر سوداګریزو توکو یې تعرفې کمې کړې او پر دې برسېره به د تجارتي اموالو د انتقال په برخو کې هم اغیزمن ګامونه پورته کړي، هغه همداراز څرګنده کړه چي حکومت یې له افغانستان سره دوه اړخیز تجارت او ټرانزیټ ته د لا پراختیا هوډ لري او ژمنه یې وکړه چې په یادو برخو کې به لازمې آسانتیاوي رامنځته کوي.
ښاغلي اسحاق ډار وویل چي له افغان مهاجرینو سره به ناوړه چلند نه کیږي او دوی به په دي برخه کي جدي ګامونه واخلي، نوموړی وویل د افغان مهاجرینو جایدادونه او سرمایې د هغوی ملکیت دی او اجناس یې هیڅوک نشي ایسارولی،هغه ژمنه وکړه چې پاکستاني امنیتي ارګانونه به په دې برخه کي د هر ډول خپل سري عمل مخه نیسي.
همداراز په دغه ناسته کي د سفارتي اړیکو پر لوړولو، همږغۍ،ګډې همکارۍ، د ویزو پر زیادت او اسانتیا، زارعتي محصولاتو پر چټک انتقال، د سوداګرۍ او ټرانزیټ پر ودې او یو شمېر سترو پروژو لکه فغان ټرانس، کاسا ۱۰۰۰، ټاپي او ټاپ پر اهمیت، روان بهیر او دې برخو ته پر ځانګړي پام خبرې وشوې.
د ناستې په پای کې د یادو شویو موضوعاتو د تعقیب لپاره د ګډو کمیټو پر ټاکلو او د دواړو هیوادونو ترمنځ د مسائلو د اواري پر مؤثرو لارو چارو هوکړه وشوه.
