په غزې تړانګه کې په خطرناک ډول د بشري ناورین د پراخېدو خبرداری ورکړل شو
کابل ټکی کام (يکشنبه، ۳۱ وری، ۱۴۰۴ل)
د خوړو نړیوال پروګرام خبرداری ورکړی چې د غزې په تړانګه کې د بشري ناورین په خطرناک ډول پراخېږي.
ياد سازمان ويلي، چې نږدې دوه میلیونه کسان، چې ډېری یې بېځایه شوي دي، پرته له عاید څخه ژوند کوي او په بشپړ ډول د خوړو مرستو ته اړتيا لري.
د خوړو نړیوال پروګرام ويلي، چې غزه کې د خوړو زېرمې په شدیده توګه کميږي، چې دا د یو انساني ناورین د راتلو خبرداری دی.
ياد سازمان وايي، چې غزه بیړني او دوامداره د خوراکي مرستو بهیر ته اړتیا لري، ترڅو د خوړو د خوندیتوب له بشپړ سقوط څخه مخنیوی وشي، خو زياتوي اسرائيلو د سرحدي لارو تړل کېدو له امله غزې ته د خوراکي توکو د داخلېدو مخه نیولې ده.
له بله پلوه د ملګروملتونو د بشري حقونو يوې ادارې ويلي، چې د ۲۰۲۵ کال د مارچ په پای کې، په غزه کې د نړیوال خوراکي پروګرام لخوا تمویلېدونکې وروستۍ بیکرۍ هم وروسته له هغې وتړل شوه چې اوړه او سون توکي ختم شول، او خپلې دروازې یې د هغو لسګونو زرو کورنیو پرمخ وتړلې چې پوره توګه یې د ارزانه ډوډۍ لپاره پر دغو بیکریو تکیه لرله.
د دغو بیکریو بندیدل یوازې یو عادي خبر نه دی، بلکې د خطر یو ریښتینی زنګ دی، چې د هر کور دروازې ته یې ټک وواهه، اعلان یې وکړ چې لوږه اوس له تمې زیات نژدې شوې، او سختې ورځې پیل شوې دي.
ارو-متوسطي څارونکي ادارې ویلي، چې د دوی ټیمونو په غزه کې داسې خطرناکې نښې ثبت کړي چې ښيي اوسېدونکي د سخت خوراکي ناامنه حالت ته نژدې شوي، کوم چې د قحطۍ درجې ته رسېږي.
ارو-متوسطي څارونکي ویلي، له یو میلیون زیات ماشومان په غزه کې له شدیدې کم غذايۍ کړیږي، اوبه نشته، روغتیایي مرکزونه نړېدلي، او خلک له عادي انساني شرایطو بې برخې دي.
