کابل ټکی کام (چهارشنبه، ۳ غویی، ۱۴۰۴ل)
د راپورونو له مخې، اردني چارواکو د دې هېواد د کورنیو چارو وزیر مازن الفرايه په مشرۍ د اخوان المسلمین ډله غیرقانوني اعلان کړه او سملاسي یې د منحلولو اعلان وکړ.
د دغه پرېکړې له مخې، د اخوان المسلمین ټول دفترونه تړل شوي، شتمنۍ یې ضبط شوي او فعالیتونه یې په بشپړ ډول بند شوي دي.
چارواکو ويلي، دا اقدام وروسته له هغه وشو چې د یادې ډلې څو غړي په “تخريبکاره فعالیتونو” تورن شول. د اردن چارواکو تور پورې کړی وايي، چې نیول شویو کسانو په لبنان کې نظامي روزنه ترلاسه کړې وه او موخه یې په اردن کې د راکټونو او بېپیلوټه الوتکو له لارې بریدونه ترسره کول وو.
وزیر الفرايه زیاته کړې، د یادې ډلې ځینو غړو د هېواد امنیت له ګواښ سره مخ کړی، د وسلو او چاودېدونکو توکو د تولید او پټولو هڅې یې کړي او د پلازمېنې په شاوخوا سیمو کې یې د توغندیو د پټولو ځایونه جوړ کړي وو.
د يادولو ده، چې د اخوان المسلمین ډله یوه پخوانۍ اسلامي اصلاحپاله سازمان بلل کېږي چې د حماس غورځنګ ورسره نږدې اړیکې لري. دا پرېکړه داسې مهال شوې چې له دې وړاندې مصر او سوریې هم د اخوان المسلمین فعالیتونه منع کړي او مشران یې نیولي دي.
په همدې لړ کې، تېره اوونۍ د اردن امنیتي ځواکونو ۱۶ تنه نیولي وو چې له دې ډلې سره تړاو درلود، مالي ملاتړ یې ترلاسه کړی و او د بریدونو پلان یې لاره.
