کابل ټکی کام (چهارشنبه، ۳ غویی، ۱۴۰۴ل)
د افغانستان اسلامي امارت د بهرنیو چارو وزیر مولوي امیر خان متقي د روسیې د ولسمشر له ځانګړي استازي ضمیر کابلوف سره په کابل کې کتلي دي.
د بهرنيو چارو وزارت په خبرپاڼه کې راغلي ، چې په دې لیدنه کې دواړو خواوو د سیاسي، اقتصادي او سوداګریزو اړیکو پر پراخېدو خبرې کړي دي.
ښاغلي متقي د روسیې د هغه اقدام ستاينه کړې چې پر اساس یې د «طالبانو غورځنګ» پخوانی او اوسنی اسلامي امارت نوم له ممنوعه ډلو له ليست څخه وویستل شو، او دا یې د متقابل احترام نښه بللې ده.
نوموړي همداراز د روسیې له هغه پرېکړې هم مننه وکړه چې د افغانستان اسلامي امارت یو دیپلومات یې په مسکو کې د سفیر په کچه منلی دی او زیاته یې کړه چې ډېر ژر به افغانستان مسکو ته رسمي سفیر معرفي کړي.
دغه راز ضمیر کابلوف بيا ويلي، چې روسیه د افغانستان سره اړیکو ته ارزښت ورکوي او د همدې هدف لپاره یې یاد ګامونه اخیستي. هغه زیاته کړې چې د راتلونکې مۍ میاشتې په ترڅ کې به د کازان فورم پر مهال د دواړو هېوادونو د دایمي کمیسیون د پیل غونډه هم ترسره شي.
ښاغلي کابلوف دا تحول د دواړو هېوادونو ترمنځ د نویو اړیکو د پيل نښه بللې او هیله یې وښوده چې دا به د سیمې ثبات ته هم ګټه ورسوي.
