کابل ټکی کام (جمعه، ۱۹ غویی، ۱۴۰۴ل)
د نظامي چارو مشهور شنونکی، متقاعد جنرال فائز الدویري، وایي چې د حماس اسلامي غورځنګ پوځي څانګې “القسام” له لوري په رفح کې ترسره شويو وروستيو بریدونو وښوده، چې د دې ډلې څلور کنډکونه لا هم فعال دي او له جګړې وتلي نه دي. نوموړي دغه څرګندونې له الجزیرې سره په یوه ځانګړې مرکه کې کړې دي.
دویري زیاته کړې، چې د القسام له خوا ترسره شوي کمینونه او چریکي بریدونه د دقیق پلان او هماهنګۍ ښکارندوي کوي، دا افشا کوي، چې د اسرائیلو هغه ادعاوې ناسمې دي چې وايي د رفح کنډکونه یې ویجاړ کړي دي. “دې بریدونو وښوده، چې قسام لا ژوندي دی، فعال دی، او د اشغالګرو پر وړاندې مقاومت ته دوام ورکوي.
نوموړي ټینګار وکړ، چې له شاوخوا شلو میاشتو جګړې او بېسارې بمبارۍ وروسته، دا ډول پوځي عملیات د اسرائیلي ځواکونو د ناکامۍ څرګند مثال دی. دویري وایي: “کله چې تر دې ټولو پوځي هڅو وروسته بیا هم مقاومت داسې بریدونه کوي، نو دا باید پوښتنه راولاړوي، چې د غزې دایمي اشغال یعني څه؟ د قسام د له منځه وړلو خبرې تر کومه حده واقعیت لري؟”
فائز الدویري په دې باور دی چې د رفح جګړه، چې اسرائیل پرې ډېر تمرکز لري، لا هم د فلسطیني مقاومت لپاره د فعالیت ډګر دی، او د جګړې پای ته رسېدل یا د حماس ختمېدل تر اوسه یواځې تبلیغاتي ادعاوې دي، نه عملي واقعیت.
