کابل ټکی کام (سه شنبه، ۲۳غویی، ۱۴۰۴ل)
د ریاستالوزراء اقتصادي مرستیال ښاغلي ملا عبدالغني برادر اخوند په مشرۍ د اسلامي امارت لوړپوړی پلاوی سبا چهارشنبه (د ۱۴۰۴ لمریز کال د ثور ۲۴مه) د روسیې تاتارستان جمهوریت ته روانېږي، ترڅو د کازان ۱۶م نړیوال اقتصادي فورم کې ګډون وکړي.
یاد پلاوی به د اقتصادي، سوداګریزو او پانګوالو اړیکو د پراخوالي په موخه د بیلابیلو هېوادونو له استازو سره کتنې ولري.
د اقتصادي معاونيت په خبرپاڼه کې راغلي چې د سفر ترمخه، نن په مرمرینه ماڼۍ کې د ریاستالوزراء د اقتصادي مرستیال په مشرۍ مشورتي ناسته ترسره شوه زياتوي چې په دې ناسته کې د بهرنیو چارو وزارت مسؤلینو د یاد سفر اړوند معلومات له پلاوي سره شریک کړل، او د ښې استازولۍ او اغېزمن ګډون لپاره لازمې سپارښتنې هم وشوې.
د کازان اقتصادي فورم، چې دا ځل یې ۱۶مه دوره ترسره کېږي، د روسیې په تاتارستان جمهوریت کې له کلونو راهیسې د اسلامي هېوادونو د همکارۍ سازمان (OIC) او روسیې ترمنځ د اقتصادي همکاریو د پیاوړتیا یو مهم نړیوال پلیټفارم ګڼل کېږي.
سږکال به هم ګڼ شمېر اسلامي هېوادونه، نړیوال پانګهوال، د خصوصي سکتور استازي، اقتصادي کارپوهان او دولتي چارواکي پکې ګډون وکړي.
د فورم موخه دا ده چې د اسلامي نړۍ او روسیې ترمنځ اقتصادي همکارۍ پیاوړې شي، د پانګونې فرصتونه وڅېړل شي او د خصوصي سکتور ترمنځ ګډو نوښتونو ته زمینه برابره شي.
