کابل ټکی کام (پنجشنبه، ۱ غبرګولی، ۱۴۰۴ل)
د یمن وسله والو ځواکونو ادعا کړې چې د اشغالي فلسطین د یافا ښار بن ګوریون نړیوال هوايي ډګر باندې یې د فوق الصوت بالستیک توغنديو بریدونه کړي دي
په یوه رسمي بیان کې چې د یمن د وسله والو ځواکونو د ویاند جنرال یحیی سریع له خوا خپور شوی، ویل شوي چې دغه عملیات د فلسطین د مظلوم ملت او د غزې د مجاهدینو د ملاتړ په موخه ترسره شوي دي.
بیان زیاتوي، توغندي په بریالیتوب خپل هدف ته رسیدلي دي او زرګونه صهیونیستان اړ شوي چې پناه ځایونو ته وتښتي. د هوايي ډګر پروازونه ځنډول شوي او ګڼې الوتکې چې اسرائیلو ته روانې وې اړ شوې چې بېرته خپلو هېوادونو ته وګرځي.
د یمني پوځ په وینا، دا بریدونه یوازې په ۲ ساعتونو کې ترسره شوي او د صهیونیستي ريژیم دفاعي سیستم یې په مخنیوي کې پاتې راغلی دی.
بیان کې ویل شوي چې یمني ځواکونه به خپل ملاتړ کوونکي عملیات لا پراخوي او دا عملیات به تر هغو دوام کوي، څو په غزه باندې یرغل پای ته ونه رسېږي او محاصره ختمه نه شي.
د ویلو ده، چې یمني ځواکونه داسې مهال بریدونه کوي، چې په غزه کې د اسرائیلو له خوا پر ولسي خلکو سخت بریدونه دوام لري او د انساني ناورین وېره ورځ تر بلې زیاتېږي.
