افغانستان کې د غزې په ملاتړ ستر لاریونونه ترسره شول
کابل ټکی کام (جمعه، ۹ غبرګولی، ۱۴۰۴ل)
د افغانستان په بېلابېلو ولایتونو کې زرګونو کسانو نن د جمعې په ورځ د غزې د مظلومو خلکو په ملاتړ او د صهیونیستي ترهګر ريژیم د جنایتو پر ضد ستر لاریونونه وکړل.
په پلازمینه کابل، سمنګان، پنجشېر، کندز، کونړ او یو شمېر نورو ولایتونو کې لسګونه زره خلک د جمعې له لمانځه وروسته واټونو ته راووتل، د فلسطین بیرغونه یې پورته کړي وو، او د “مرګ پر اسرائیل” او “غزه یواځې نه ده” په څېر شعارونه یې ورکول.
په کابل کې لاریون د وزیر اکبر خان له جوماته پیل شو او زرګونه کسانو پکې ګډون کړی و. مظاهرهچیانو له نړیوالې ټولنې وغوښتل چې د غزې د ولس پر وړاندې د اسرائیلي ځواکونو وحشیانه بریدونه وغندي او د جګړې د بندېدو لپاره سمدستي اقدام وکړي.
یوه لاریونوال وویل: “فلسطینیان زموږ د عقیدې وروڼه دي، موږ یې غږ یو، او دا ظلم باید نور پای ومومي.”
د افغانستان اسلامي امارت هم د غزې پر خلکو د بریدونو په غبرګون کې مخکې له مخکې غبرګون ښودلی او دا بریدونه یې “جنایت” بللي دي. د اسلامي امارت ویاند ویلي: “اسلامي هېوادونه باید یو موټی شي او د فلسطین د ولس ملاتړ وکړي.”
د یادونې وړ ده چې دا لاریونونه په داسې حال کې ترسره کېږي چې د غزې په تړانګه کې د اسرائیلو له خوا روان بریدونه د سخت بشري ناورین سبب شوي، چې په ترڅ کې یې زرګونه فلسطینیان شهیدان شوي او ټپیان شوي دي.
