کابل ټکی کام (چهارشنبه، ۲۱ غبرګولی، ۱۴۰۴ل)
د حج مناسکو تر ادا کولو وروسته د افغان حاجیانو لومړنی پرواز نن چهارشنبه له سعودي عربستان څخه د کابل نړیوال هوايي ډګر ته راورسېد.
د افغانستان د حج اوقافو وزارت وايي، چې په دې پرواز کې د کابل او لغمان ولایتونو ۳۴۶ تنه حاجیان شامل وو، چې د ارشاد، حج او اوقافو وزارت مرستیالانو، د اسلامي امارت یو شمېر لوړپوړو چارواکو، امنیتي مسؤولینو، د آریانا او کام ایر شرکتونو استازو او نورو مسؤلینو له لوري د ګلانو په ورکولو سره هرکلی ورته وشو.
سږ کال د ارشاد، حج او اوقافو وزارت او اړوندو ادارو په همکارۍ له ټول هېواد څخه ۳۰ زره حاجیان د آریانا افغان او کام ایر شرکتونو له لارې د ۹۷ پروازونو په ترڅ کې حرمینو شریفینو ته لېږدول شوي وو، چې دا لړۍ پرته له کومې ستونزې بشپړه شوې ده.
