کابل ټکی کام (پنجشنبه، ۲۲ غبرګولی، ۱۴۰۴ل)
د معلوماتو له مخې، د القسام ځواکونو پرون له غرمې مخکې د هغو کسانو د اعدام حکم عملي کړ، چې مخکې تر دې ورباندې د جاسوسۍ، غلا، او لاره وهلو تورونه ثابت شوي وو. پېښه د خانيونس ولایت په شمال لوېدیځه سیمه کې رامنځته شوې ده.
په ټولیز ډول ۱۲ تنه اعدام شوي، او درې نور کسان چې له ورته تورونو سره مخ وو، په پښو ویشتل شوي دي.
د القسام سرچينې وايي، چې ځینې له دغو کسانو د اشغالګرو لپاره جاسوسان وو، یو شمېر یې لاره وهونکي او غله وو، او ځینې داسې کسان هم پکې شامل وو چې له هغو مرستندویه شرکتونو سره یې کار کاوه، کوم چې د امریکایي مزدورانو (اجیرو ځواکونو) تر اداره لاندې فعالیت کوي.
سرچینې وايي، د القسام د «سهم» په نوم ځانګړې قطعې څو ورځې وړاندې یادو کسانو ته اخطارونه لېږلي وو، او ورته ویل شوي وو چې د دوی همکاري له یادو شرکتونو سره معلومه شوې ده.
دغه شرکتونه په سیمه کې د ګڼ شمېر ملکي وګړو د وژلو لامل شوي، او خبرداری ورکړل شوی و، که خپل فعالیت يې ونه دراوه، اعدام به شي.
