کابل ټکی کام (يکشنبه، ۲۵ غبرګولی، ۱۴۰۴ل)
د لوګر ولایت د محمداغې ولسوالۍ په سفیدسنګ سیمه کې د ۲۰ کیلوولټه برېښنا رسونې پروژې د چارو د پیل پرانیسته وشوه. دغه پروژه د اوبو او انرژۍ وزیر ملا عبدالطیف منصور، ځايي مسؤلینو او لسګونه قومي مشرانو په حضور کې رسماً پیل شوه.
د اوبو او انرژۍ وزارت د معلوماتو له مخې، دغه پروژه به په یوه کال کې بشپړه شي او څه باندې ۳۱ میلیونه افغانۍ لګښت پرې راځي چې د ياد وزارت له بودیجې ورکول کېږي.
د سیمې خلک وايي چې له دې پروژې سره به د سفیدسنګ زرګونه اوسېدونکي د برېښنا له آسانتیاوو برخمن شي، او دا پرمختګ به د سیمې پر اقتصاد او ورځني ژوند مثبت اغېز ولري.
