عبدالحی قانت
قزاقستان تېر څلور کاله له افغانستان سره په اقتصادي برخه کې مناسب پرمختګ وکړ. د دواړو هیوادونو د اقتصادي سکتورونو تر منځ لار نقشه لاسلیک شوه چې له مخې به یې دوه اړخیز تجارت ۳ میلیارده ډالره ته پورته کېږي. همداراز، د زیربناء په برخه کې هغه ورځ د ۵۰۰ میلیونه ډالره هغه پروژه لاسلیک شوه چې په اساس به یې له تورغونډي څخه هرات ته د رېل پټلۍ غځېږي. د دې تر څنګ تیارۍ روانې دي چې افغانستان د شمال – جنوب کوریډور برخه شي چې پر بنسټ به یې ،په اوږد مهال کې، د افغانستان له ستراتیژیک موقعیت څخه ځانکړې مثبته استفاده وشي.
د دې ټولو اقتصادي پرمختګونو تر څنګ کابل ته د قزاقستان د بهرنیو چارو د وزیر د راتګ دوه لوی پیامونه درلودل:
۱ د قزاقستان د بهرنیو چارو د وزیر لومړی راتګ دا په ډاګه کوي چې دوی غواړي افغانستان سره د اقتصادي سکتور تر څنګ سیاسي برخه کې اړیکې تقویه کړي. دوی وغوښتل دا سګنال وړاندې کړي چې په سیمه کې د افغانستان د سیاسي نښلون او اوږد مهالي ثبات ټینګه اراده لري.
۲ د سیاسي اړیکو د لا تقویې په خاطر یاد هیواد تصمیم نیولی چې په لنډه موده کي به په استانه کې د ا.ا.ا رسمي سفیر ومني او کابل کې د خپل سفارت کچه د سفیر سطحې ته پورته کړي. د قزاقستان لخوا دا ځانکړی تصمیم او د بهرنيو چارو وزير له لوري خپل افغان سیال ته دا ډاډ ورکول په دې وخت کې د سیاسي اړیکو د نوي پیل لپاره مهم سګنال دی.
