(کابل ټکی کام، شنبه، ۲۱ چنګاښ ۱۴۰۴):
په تاشکند کې د افغانستان اسلامي امارت سفیر شیخ عبدالغفار بحر د ازبکستان د بهرنیو چارو له وزیر بختیار سعیدوف سره لیدنه کړې ده. د دغه ملاقات پر مهال دواړو لوریو د سیاسي، اقتصادي، سوداگریزو او کلتوري اړیکو د پیاوړتیا پر لارو چارو تفصیلي خبرې کړي دي.
سفیر بحر ټینګار کړی چې د دواړو هېوادونو ترمنځ سیاسي تعامل باید لا پیاوړی شي او دوه اړخیزې همکارۍ دې پراخې شي. هغه د افغان ټرانس پروژې، سوداګرو ته د ویزې اسانتیاوو او د سرحدي چارو د سادهسازۍ موضوعات مهم وګڼل.
د ازبکستان د بهرنیو چارو وزیر بختیار سعیدوف د افغانستان د اسلامي امارت د سفارت فعال رول وستایه او ډاډ یې ورکړ چې د سیاسي او اقتصادي همکاریو پراختیا ته ژمن دي.
