کابل ټکی کام (یکشنبه، ۲۲ چنګاښ، ۱۴۰۴ل)
د اسراییلي پوځ پخواني جنرال اسحاق بریک ویلي، چې د غزې جګړه د اسراییلو لپاره پر یوه ستر نظامي، سیاسي او اخلاقي بحران بدله شوې، او که چیرې پوځ وغواړي خپل حیثیت وژغوري، باید له غزې څخه باعزته وتل غوره کړي.
اسراییلي رسنیو د بریک له قوله راپور ورکړی، چې وایي:
> “موږ باید پوه شو چې دا جګړه نور د بریا نه ده، مقاومت لا هم قوي دی، زموږ پوځیان ستړي او تر روحي فشار لاندې دي، او ورځ تر بلې د تلفاتو کچه لوړیږي.”
نوموړي ټینګار کړی، چې که اسراییل همداسې جګړه وغځوي، نو نه یوازې به نور پوځیان له لاسه ورکړي، بلکې نړیوال حیثیت او داخلي مشروعیت به یې هم له خطر سره مخ شي.
اسحاق بریک، چې د نظامي چارو شنونکی هم دی، زیاتوي:
> “له غزې وتل کمزوري نه، بلکې د عقل، تدبیر او ستراتېژۍ نښه ده. باید یو سیاسي هواري ته ورسېږو، تر څو نور له سختو عواقبو وژغورل شو.”
د یادونې ده چې بریک له هغو جنرالانو څخه دی، چې تل یې د نتنیاهو حکومت لخوا د جګړې پر دوام نیوکې کړې، او دا جګړه یې د اسراییلي پوځ لپاره د زوال لامل بللې ده.
