کابل ټکی کام (سه شنبه، ۲۴ چنګاښ، ۱۴۰۴ل)
د مهاجرینو ستونزو ته د رسېدنې عالي کمېسیون د یکشنبې ورځې راپور ښيي، چې د هېواد له بېلابېلو پولو لکه اسلامکلا، ورېښمو، سپین بولدک او تورخم له لارې ټولټال ۲۳۷۷۶ افغان مهاجرین په جبري توګه هېواد ته راستانه شوي دي. یوازې د اسلامکلا له لارې ۱۵۱۲۸ تنه، د ورېښمو له لارې ۵۹۱۷ تنه، له سپین بولدک ۴۴۶ تنه او له تورخم ۳۰۹ تنه ثبت شوي دي.
راستنو شویو کورنیو ته د مختلفو کمېټو له خوا روغتیايي، ټرانسپورتي، مالي، عامه پوهاوي او مخابراتي خدمات وړاندې شوي دي. د مالي مرستو په برخه کې له زرګونو کورنیو سره نغدي مرسته شوې، چې یوازې په اسلامکلا کې یې ارزښت شاوخوا ۱۵ میلیونه افغانۍ ښودل شوی دی. همداراز، سلګونه کورنۍ خپلو اصلي ولایتونو ته خوندي لېږدول شوې دي.
د راپور پر بنسټ، په ورېښمو، سپین بولدک او تورخم کې مهاجرینو ته د ثبت، لېږد، روغتیايي خدماتو، عامه پوهاوي، سمکارتونو وېش، خوراکي توکو او نورو اړینو برخو کې لازم خدمتونه برابر شوي دي. له کابل څخه هم شاوخوا ۲۶۵۹ تنه د هېواد بېلابېلو ولایتونو ته انتقال شوي دي.
