(کابل ټکی کام، چهارشنبه، ۲۵ چنګاښ ۱۴۰۴):
د افغانستان اسلامي امارت په یوه خپره کړې اعلامیه کې د اسراییلي رژيم هغه وروستي بریدونه په کلکو ټکو غندلي دي چې پر سوریې، په ځانګړې توګه په دمشق او نورو سیمو ترسره شوي دي.
اسلامي امارت دا بریدونه د یوه خپلواک هېواد پر حاکمیت ښکاره تېری او د سیمې د بېثباته کولو او ګډوډۍ خپرولو یو سیستماتیک جنایت بللی دی.
اسلامي امارت ټینګار کړی چې دغه ډول یرغلونه د نړیوالو اصولو او قوانینو ښکاره سرغړونه ده او نه یوازې د سوریې د خلکو، بلکې د ټولې سیمې د امنیت لپاره خطرناک دي.
په اعلامیه کې له سیمهییزو هېوادونو او نړیوالو سازمانونو غوښتنه شوې چې د دغو بریدونو پر وړاندې خپل مسؤلیت ادا کړي، د سوریې د خلکو او مشروع حکومت خپلواکۍ ته درناوی وکړي او د اسراییلي رژيم د تجاوز مخه ژر تر ژره ونیسي.
